Quyoshning iliq tafti Surxondaryo viloyatidagi purviqor tog‘larning quyi qismlarida oppoq qorlarni eritib, asta-sekin tabiatni uyg‘otmoqda. Mudrab yotgan yerlarda ko‘klam nafasi esayotir. Qish uyqusiga ketgan hayvonlar birin-ketin tog‘u-toshlar qo‘ynidan bo‘y ko‘rsatmoqda. Qish chillasi jiddiy sinovlar bilan o‘tgan Hisor tog‘ining Sariosiyo tumanidagi tizmalarida barpo etilgan “Yuqori To‘palang” milliy tabiat bog‘ida ko‘payayotgan yovvoyi hayvonlar nazoratchilar e’tiboriga tushdi.